माघ १८, काठमाडौं । काठमाडौंबाट खाना पकाउने एलपी ग्याँसको कालोबजारी गरेको आरोपमा कपन आकाशे धाराका राजेश भारती पक्राउ परेका छन् ।

उनले संचालन गरेको रारा एडिएस इन्टरप्राइजेसबाट २५ वटा एसटिसी तथा दुई सय ५८ वटा गीता ग्याँसको सिलिन्डरसहित राजेशलाई पक्राउ गरिएको महानगरीय प्रहरी अपराध महाशाखाले जनाएको छ । यस्तै कलंकीस्थित गोर्खा मनकामना तरकारी तथा कृषि बजारमा रहेको उग्रचण्डी स्टोरबाट तीन सय २० लिटर पेट्रोल, ५० लिटर डिजल तथा एक सय २५ लिटर मट्टितेलसहित यशोदा बजगाँईलाई समेत पक्राउ गरेको छ ।

केहीदिन यता अपराध महाशाखाले पेट्रोलियम पदार्थको कालोबजारी गर्नेलाई पक्राउ गर्न फेरी तदारुपता देखाउन थालेको छ । सोमबार बरामद गरिएको उक्त परीणामको ग्याँस सिलिन्डरको संख्या अहिलेसम्मकै धेरै भएको महाशाखाको भनाइ छ । गएको शनिबार पनि महाशाखाको टोलीले एक हजार ६ सय ५० लिटर पेट्रोल, एक हजार एक सय ३५ लिटर डिजल र एक सय ३५ लिटर मट्टितेल विभिन्न ठाउँबाट बरामद गर्दै ६ जनालाई नियन्त्रणमा लिएर कारवाही प्रकृया अगाडी बढाएको थियो ।