गाँजाखेतीमा संलग्नता देखिएपछि प्रहरीका एसपीसहित १८ जना कारबाहीमा
अञ्चल प्रहरी कार्यालयका एसएसपी पवन खरेलको नेतृत्वमा बनेको छानबिन समितिले धनकुटाका प्रहरी प्रमुख एसपी विभूतिराज पाण्डे सहितलाई कारबाही गरेको हो । पाण्डेसहित १४ प्रहरीलाई नसिहत दिइएको छ । तल्लो तहका प्रहरीले गाँजा खेतीका बारेमा पाण्डेलाई जानकारी गराए पनि फाड्ने आदेश नदिएको बताइएको छ । नसिहत पाउनेको एक वर्षसम्म बढुवा हुदैन ।
उनीहरू एक वर्ष विदेश जान पाउदैनन् भने एक वर्षसम्म पुरस्कृत पनि हुदैनन् । इलाका प्रहरी कार्यालय छिन्ताङबाट सरुवा भइसकेका प्रहरी निरीक्षक नारायण भट्टराईलाई गृह मन्त्रालयले निलम्बन गरेको छ । त्यसअघि प्रहरी चौकी त्रिवेणीका असई नरेश विक, प्रहरी चौकी आँखिसल्लाका असई लोकबहादुर धिमाल र जिल्ला प्रहरी कार्यालय धनकुटाका घुमुवा असई शिव शर्मा निलम्बनमा परेका थिए ।
निलम्बनमा परेकाहरूको जागिर नै जानसक्ने बताइएको छ ।
उनीहरूलाई निलम्बन गरेर कारबाही अघि बढाएको प्रहरीले जनाएको छ । ठुलो कारबाही गर्न निलम्बन गरिएको बताउँदै एसएसपी खरेलले उनीहरुले जागिरबाटै हट्नुपर्ने हुनसक्ने बताए । छानबिन समितिले आरोपित प्रहरी र स्थानीयबासीसँग सोधपुछ गर्दा जिल्ला प्रशासन कार्यालयका कर्मचारी, राष्ट्रिय अनुसन्धानका कर्मचारी र सशस्त्र प्रहरीको पनि संलग्नता रहेको खुलेको थियोे ।
छानबिन प्रतिवेदनले उनीहरू प्रति पनि अनुसन्धान गर्नुपर्ने सुझाव दिएको छ ।धनकुटाको छिन्ताङ, आहाले, खोकु र मुगा गाविसमा हुँदै आएको गाँजा खेतीबाट छिन्ताङ निवासी योगेन्द्र राई र कुमार मंग्रातीले प्रहरी प्रशासनका लागि रकम उठाउने गरेका थिए । करिब एक करोड रुपैयाँ उठाएर दुवै जना फरार भएको प्रहरीले जनाएको छ । उनीहरूको खोजी भइरहेको प्रहरीले बताएको छ ।
0 comments
Write Down Your Responses