काठमाडौं, फागुन ९ । नेकपा एमालेको भातृसंगठन अनेरास्ववियुको २२ औं महाधिवेशनबाट नविना लामा अध्यक्षमा निर्वाचित भएकी छिन् । केही बेर अघि मात्रै सम्पन्न मतगणनाका आधारमा लामाले निकटतम प्रतिद्धन्द्धी दिपक गौतमको २१६ मत बढी ल्याएर पराजित गर्न सफल भएको अखिलका नेता आरसी लामीछानेले जानकारी दिए ।

निवर्तमान प्रवक्ता समेत रहेका नेता लामीछानेका अनुसार अघिल्लो कार्यकालमा महासचिवको भूमिका निर्वाह गरेकी लामाले कुल १५ सय ९७ जना कुल मतदातामध्येबाट ८ सय ६५ मत ल्याउन सफल भएकी हुन् । त्यस्तै लामा प्रतिद्वन्द्वी दीपक गौतमले मत ६ सय ४९ पाएका छन् । आइतबारको परिणामसागै लामा अखिलको दोस्रो महिला अध्यक्ष बनेकी छिन् । एमाले केन्द्रीय सदस्य रामकुमारी झाँक्रीपछि उनी अखिलको महिला अध्यक्ष बन्न सफल भएकी हुन् ।

त्यस्तै अनेरास्ववियूको उपाध्यक्षमा रश्मि आचार्य, महेश बर्तौला, सुनिता बराल, शैलेस लामा विजयी भएका छन् भने महासचिवमा ऐनबहादुर महर विजयी भएका छन् । प्यानलको शीर्ष स्थानमा बिजय भएका सबै संस्थापन पक्ष ओली निकटतम उम्मेदवार हरु हुन् ।