जिल्लामा भित्रने हरेक कम्पनीको ग्यासमा प्रहरीले आफ्नो हिस्सा खोज्ने गरेको छ । घोराहीस्थित मनकामना ग्यासका एक बिक्रेताले पनि हरेक लटमा ८–१० सिलिन्डर प्रहरी प्रशासनलाई दिनुपरेको बताउँछन् । पेट्रोलियम पदार्थमा प्रशासनको कोटा सिस्टम लागू गरिएको भए पनि ग्यासमा भने कोटा छुट्याइएको छैन । 'प्रशासनको आदेश भनेर ग्यास माग्न आउनेहरूलाई दिन करै लाग्छ,' ती बिक्रेताले भने । तर, ड्युटी गरेकै कारण प्रहरीले ग्यास नपाएको बताए । बिक्रेताका अनुसार प्रशासनका नाममा ग्यास माग्न आउनेहरू अधिक छन् । बिक्रेताले केहीलाई ग्यास दिन्छन् भने केहीलाई फिर्ता पठाउँछन् । 'कोही सादा पोसाकमा आएर प्रशासनलाई ग्यास चाहियो भन्छन् कोही ड्रेसमा हुन्छन्,' एक बिक्रेताले भने, 'को हुन्, को हुन् ? चिन्नै सकिन्न ।'